कोशी प्रदेशका मुख्यमन्त्री र आर्थिक मामिला मन्त्रीद्वारा वरुण बहुमुखी क्याम्पसको अवलोकन, DPR प्रस्तुत तथा समसामयिक विषयमा अन्तरक्रिया

07, Nov 2026 | कोशी प्रदेशका मुख्यमन्त्री र आर्थिक मामिला मन्त्रीद्वारा वरुण बहुमुखी क्याम्पसको अवलोकन, DPR प्रस्तुत तथा समसामयिक विषयमा अन्तरक्रिया

आज मिति २०८३ कार्तिक २१ गते शनिबार कोशी प्रदेशका माननीय मुख्यमन्त्री श्री हिक्मतकुमार कार्की र माननीय आर्थिक मामिला तथा योजना मन्त्री श्री विदुरकुमार सुब्बाज्यूलाई वरुण बहुमुखी क्याम्पस, खाँदबारी, सङ्खुवासभामा स्वागत तथा सम्मान गरिएको छ।

कार्यक्रमका अवसरमा क्याम्पसको समग्र शैक्षिक, भौतिक तथा संस्थागत विकासका लागि तयार गरिएको विस्तृत परियोजना प्रतिवेदन (DPR) प्रस्तुत गरिएको थियो। साथै क्याम्पसको वर्तमान अवस्था, भावी योजना, आवश्यक पूर्वाधार विकास, शैक्षिक गुणस्तर अभिवृद्धि तथा जिल्लाको उच्च शिक्षाको विकासका विषयमा समसामयिक अन्तरक्रिया गरिएको थियो।

कार्यक्रममा कोशी प्रदेश सरकारका माननीय राजेन्द्र कार्की, पूर्व सांसद श्री राजेन्द्र गौतमज्यू,नेकपा (एमाले) का अध्यक्ष श्री खड्गबहादुर राई, क्याम्पस व्यवस्थापन समितिका अध्यक्ष श्री अनन्त गौली, उपाध्यक्ष श्री लेखनाथ बुढाथोकी, व्यवस्थापन समितिका सदस्यज्यूहरू, क्याम्पस प्रमुख श्री चित्ररेखा कार्की, सहायक क्याम्पस प्रमुख श्री छत्रमणी पन्त, प्राध्यापक तथा कर्मचारीहरू लगायतको उपस्थिति रहेको थियो।

अन्तरक्रियाका क्रममा क्याम्पसको विकास र विस्तारका लागि प्रस्तुत गरिएका विषयप्रति सकारात्मक प्रतिक्रिया प्राप्त भएको छ। प्रदेश सरकारका नेतृत्व तथा प्रतिनिधिहरूबाट व्यक्त सकारात्मक धारणा र चासोले क्याम्पसको भावी विकासप्रति थप आशा र विश्वास जगाएको छ।

आजको कार्यक्रमले सबैको मुहारमा देखिएको मुस्कान र व्यक्त सकारात्मक भावनाले सङ्खुवासभाका सन्ततिको जीवनमा शिक्षाको उज्यालो फैलाउने र उच्च शिक्षामा सङ्खुवासभा कै नमुना क्याम्पस बनाउने हाम्रो साझा अभियानलाई सार्थक बनाउने आशा मा थप योगदान पुगेको विश्वास क्याम्पस प्रमुख श्री चित्ररेखा कार्कीले बताउनु भएकोछ ।

क्याम्पसको शैक्षिक उन्नयन, भौतिक पूर्वाधार विकास र गुणस्तरीय उच्च शिक्षाको पहुँच विस्तारका लागि सबै पक्षको साथ, सहयोग र सहकार्य निरन्तर प्राप्त हुने विश्वास क्याम्पस व्यवस्थापन समितिका अध्यक्ष श्री अनन्त गौलीले व्यक्त गर्नुभएको छ।

Go back to Notice