वरुण बहुमुखी क्याम्पसको विस्तृत परियोजना प्रतिवेदन (DPR) प्रस्तुत ।

07, Nov 2026 | वरुण बहुमुखी क्याम्पसको विस्तृत परियोजना प्रतिवेदन (DPR) प्रस्तुत ।

वरुण बहुमुखी क्याम्पसको विस्तृत परियोजना प्रतिवेदन (DPR) प्रस्तुत

पूर्वाधार विकास कार्यालय, सङ्खुवासभाको सहयोगमा तयार पारिएको DPR इन्जिनियर रमन श्रेष्ठद्वारा क्याम्पसमा प्रस्तुत

मिति २०८३ कार्तिक २०, वरुण बहुमुखी क्याम्पसको भौतिक पूर्वाधार विकास तथा शैक्षिक संस्थाको दीर्घकालीन योजनाबद्ध विकासलाई लक्षित गरी तयार पारिएको विस्तृत परियोजना प्रतिवेदन (DPR) प्रस्तुत गरिएको छ।

DPR निर्माण कार्य सम्पन्न भएपछि क्याम्पसमा आयोजित एक कार्यक्रममा इन्जिनियर रमन श्रेष्ठले उक्त प्रतिवेदन प्रस्तुत गर्दै त्यसमा समेटिएका पूर्वाधार विकासका योजना, संरचनागत पक्ष तथा भावी विकासका सम्भावनाबारे जानकारी गराउनुभएको थियो।

उक्त DPR निर्माण कार्य पूर्वाधार विकास कार्यालय, सङ्खुवासभाको सम्पूर्ण सहयोगमा सम्पन्न भएको हो। यस महत्वपूर्ण कार्यलाई अगाडि बढाउन तत्कालीन क्याम्पस सञ्चालक समितिका अध्यक्ष श्री दीर्घध्वज चापागाईं, सदस्य श्री खड्ग राईलगायत तत्कालीन समितिका सम्पूर्ण पदाधिकारीहरूको प्रत्यक्ष भूमिका र पहल रहेको थियो।

कार्यक्रममा क्याम्पस सञ्चालक समितिका अध्यक्ष श्री अनन्त गौली, उपाध्यक्ष श्री लेखनाथ बुढाथोकी, सदस्यहरू श्री डिल्लीराम श्रेष्ठ तथा श्री दिव्य बराल, पूर्व सञ्चालक समिति सदस्य श्री खड्ग राई, पूर्व क्याम्पस प्रमुख श्री किरण शाक्य, पूर्वाधार विकास कार्यालयका इन्जिनियर, क्याम्पस प्रमुख श्री चित्ररेखा कार्की, सहायक क्याम्पस प्रमुख श्री छत्रमणि पन्त, प्राध्यापक, कर्मचारी तथा विद्यार्थी प्रतिनिधिहरूको उपस्थिति रहेको थियो।

कार्यक्रममा प्रस्तुत DPR ले क्याम्पसको भावी भौतिक पूर्वाधार विकासका लागि योजनाबद्ध आधार तयार गर्ने विश्वास व्यक्त गरिएको छ। यसले आवश्यक पूर्वाधार निर्माण, स्रोतसाधनको उचित व्यवस्थापन तथा विकासका प्राथमिकता निर्धारण गर्न महत्वपूर्ण मार्गदर्शन प्रदान गर्ने अपेक्षा गरिएको छ।

क्याम्पसको संस्थागत विकास र शैक्षिक गुणस्तर अभिवृद्धिका लागि पूर्वाधार विकासलाई प्राथमिकतामा राख्दै तयार गरिएको यस प्रतिवेदनलाई आगामी दिनमा कार्यान्वयनको चरणमा लैजान सम्बन्धित निकाय, क्याम्पस प्रशासन तथा सरोकारवाला पक्षबीच आवश्यक समन्वय र सहकार्यको अपेक्षा गरिएको छ।

वरुण बहुमुखी क्याम्पसको समग्र विकासको महत्वपूर्ण आधारका रूपमा रहेको यस DPR निर्माणमा सहयोग पुर्‍याउने पूर्वाधार विकास कार्यालय, सङ्खुवासभा तथा प्रतिवेदन निर्माणको प्रक्रिया अघि बढाउन योगदान पुर्‍याउने तत्कालीन सञ्चालक समितिका अध्यक्ष, सदस्यहरू एवं सम्पूर्ण पदाधिकारीहरूप्रति क्याम्पसले आभार व्यक्त गरेको छ।

Go back to Notice