शिक्षा विद्यार्थी समाजद्वारा अन्तरकक्षा हाजिरीजवाफ प्रतियोगिता सम्पन्न

खाँदबारी, संखुवासभा । वरुण बहुमुखी क्याम्पस, खाँदबारी, संखुवासभामा शिक्षा विद्यार्थी समाजको आयोजनामा अन्तरकक्षा हाजिरीजवाफ प्रतियोगिता उत्साहपूर्ण तथा सौहार्दपूर्ण वातावरणमा सम्पन्न भएको छ।

शिक्षा विद्यार्थी समाजका अध्यक्ष दिपक तामाङको अध्यक्षतामा सम्पन्न कार्यक्रममा क्याम्पस प्रमुख चित्ररेखा कार्की अधिकारीको प्रमुख आतिथ्यता तथा छत्रमणि पन्तको विशिष्ट आतिथ्यता रहेको थियो। कार्यक्रममा क्याम्पसका प्राध्यापक तथा कर्मचारीहरू, युवा रेडक्रस सर्कलका अध्यक्ष, नेचर क्लबका अध्यक्षलगायत विभिन्न अतिथिहरूको उपस्थिति रहेको थियो।

विद्यार्थी दर्शकहरूको उत्साहजनक सहभागिता रहेको प्रतियोगितामा विभिन्न कक्षाबाट १० वटा टिमको सहभागिता रहेको थियो। प्रतियोगिताले विद्यार्थीहरूको ज्ञान, सिर्जनशीलता, आत्मविश्वास, तार्किक क्षमता तथा स्वस्थ प्रतिस्पर्धात्मक भावनाको विकासमा महत्वपूर्ण योगदान पुर्‍याएको थियो।

प्रतियोगितामा उत्कृष्ट प्रदर्शन गर्दै प्रथम, द्वितीय र तृतीय स्थान हासिल गर्ने टिमहरूलाई बधाई ज्ञापन गरिएको छ। साथै प्रतियोगितामा उत्साहपूर्वक सहभागी सम्पूर्ण विद्यार्थीहरूलाई क्याम्पस परिवारका तर्फबाट धन्यवाद व्यक्त गरिएको छ।

विद्यार्थीहरूको बौद्धिक तथा सर्वाङ्गीण विकासमा सहयोग पुर्‍याउने उद्देश्यले आयोजना गरिएको उक्त प्रतियोगिता सफलतापूर्वक सम्पन्न भएकोमा क्याम्पसले आयोजक शिक्षा विद्यार्थी समाज तथा सहभागी सम्पूर्ण विद्यार्थीहरूलाई धन्यवाद दिँदै आगामी दिनमा समेत यस्ता सिर्जनात्मक तथा ज्ञानवर्धक कार्यक्रमहरूलाई निरन्तरता दिने क्याम्पस प्रमुख चित्ररेखा कार्कीले बताउनु भएको छ।